ബെംഗളൂരു: ഗതാഗതക്കുരുക്കിൽ നിന്ന് രക്ഷനേടാൻ ബെംഗളൂരു നഗരവാസികൾ ആശ്രയിക്കുന്ന റാപ്പിഡോ പോലുള്ള ബൈക്ക് ടാക്സി സർവീസുകൾ യാത്രക്കാർക്ക് ഏറെ സൗകര്യപ്രദമാണെങ്കിലും, നഗരത്തിൽ സ്ത്രീകളുടെ സുരക്ഷയെക്കുറിച്ചുള്ള ആശങ്കകൾ വീണ്ടും ശക്തമാകുന്നു. ബെംഗളൂരുവിൽ നഗരത്തിലൂടെ യാത്രാവേളയിൽ റാപ്പിഡോ ഡ്രൈവറിൽ നിന്ന് ഉണ്ടായ ദുരനുഭവം ഒരു യുവതി സാമൂഹിക മാധ്യമങ്ങളിലൂടെ പങ്കുവെച്ചതോടെയാണ് സംഭവം പുറത്തുവന്നത്.
കഴിഞ്ഞ ഒക്ടോബർ 15-നാണ് സംഭവം നടന്നത്. മഴ കാരണം യാത്ര തുടരുന്നതിൽ സംശയം പ്രകടിപ്പിച്ച യുവതിയോട് റൈഡ് റദ്ദാക്കരുതെന്ന് ഡ്രൈവർ സയ്യിദ് തൗസിഫ് സെഡ് ആവർത്തിച്ച് ആവശ്യപ്പെടുകയായിരുന്നു. എന്നാൽ യാത്ര ആരംഭിച്ചതുമുതൽ ഡ്രൈവറുടെ പെരുമാറ്റം അസ്വസ്ഥത ഉണ്ടാക്കുന്നതായിരുന്നുവെന്ന് യുവതി വ്യക്തമാക്കുന്നു. യുവതി ചെവിയിൽ ഇയർഫോൺ വെച്ചിരുന്നെങ്കിലും ഡ്രൈവർ നിരന്തരം സംസാരിക്കാൻ ശ്രമിക്കുകയും മഴക്കോട്ട് വാഗ്ദാനം ചെയ്യുകയും ചെയ്തു. ഇതിനിടയിൽ യാതൊരു ആവശ്യവുമില്ലാതെ “നിങ്ങൾ സുഖമായിട്ടിരിക്കുന്നുണ്ടോ?” എന്ന് നാല് തവണ ആവർത്തിച്ച് ചോദിക്കുകയും ചെയ്തു.
യാത്രയ്ക്ക് ശേഷം യുവതിയുടെ അപ്പാർട്ട്മെന്റിന് സമീപം എത്തിയതോടെ കാര്യങ്ങൾ കൂടുതൽ മോശമായി. ഹെൽമെറ്റ് തിരികെ വാങ്ങുന്നതിനിടയിൽ ഡ്രൈവർ യുവതിയുടെ കൈയിൽ പിടിച്ച് കുറേനേരം ബലമായി പിടിച്ചുവെക്കുകയായിരുന്നു. അപരിചിതന്റെ ഭാഗത്തുനിന്നുള്ള ഈ പ്രവൃത്തി തന്നെ ഏറെ ഭയപ്പെടുത്തിയെന്നും വേട്ടയാടപ്പെടുന്നത് പോലെയാണ് തോന്നിയതെന്നും യുവതി വ്യക്തമാക്കി. സംഭവത്തിൽ കടുത്ത മാനസിക ബുദ്ധിമുട്ടിലായ യുവതി റാപ്പിഡോയുടെ സുരക്ഷാ സംവിധാനങ്ങളെ ചോദ്യം ചെയ്ത് രംഗത്തെത്തി.
യുവതിയുടെ പരാതിയോട് പ്രതികരിച്ച റാപ്പിഡോ കമ്പനി, വിഷയം ശ്രദ്ധയിൽപ്പെട്ടിട്ടുണ്ടെന്നും ഉചിതമായ പരിഹാരം കാണുന്നതിന് സമയം അനുവദിക്കണമെന്നും മറുപടി നൽകി. എന്നാൽ ഗുരുതരമായ സുരക്ഷാ വീഴ്ചകളിൽ കമ്പനികളുടെ ഭാഗത്തുനിന്നുള്ള ഇത്തരം മറുപടികൾ യാത്രാ സുരക്ഷയെക്കുറിച്ച് വലിയ ചോദ്യചിഹ്നങ്ങളാണ് ഉയർത്തുന്നത്. സാമൂഹിക മാധ്യമങ്ങളിൽ വൈറലായ ഈ സംഭവത്തിൽ ബെംഗളൂരു സിറ്റി പോലീസ് സ്വമേധയാ ഇടപെടുകയും, കൂടുതൽ അന്വേഷണത്തിനായി യുവതിയോട് മുഴുവൻ വിവരങ്ങളും പങ്കുവെക്കാൻ ആവശ്യപ്പെടുകയും ചെയ്തിട്ടുണ്ട്.
